bas-iqtisadci-access-business-talks-istirakcilarina-aib-in-reallasdirdigi-layihelerden-danisib

Baş iqtisadçı "Access Business Talks" iştirakçılarına AİB-in reallaşdırdığı layihələrdən danışıb

AccessBank-ın UNEC-də reallaşdırdığı "Access Business Talks" layihəsinin budəfəki qonağı Asiya İnkişaf Bankının (AİB) Azərbaycan nümayəndəliyinin baş iqtisadçısı Nail Vəliyev olub.

Qonaq tələbələrə AİB-in dünyada, o cümlədən Azərbaycanda reallaşdırdığı layihələr barədə ətraflı məlumat verib. AİB rəsmisi qeyd edib ki, 1966-cı ildə yaradılan adıçəkilən beynəlxalq maliyyə institutunun hazırda 68 üzvü var və onlar arasında Azərbaycan da yer alıb: "Azərbaycan 1999-cu ildən etibarən Asiya İnkişaf Bankının üzvüdür. Əməkdaşlıq müddəti ərzində AİB Azərbaycana 4 milyard dollardan çox vəsait ayırıb ki, onlar enerji, infrastruktur, maliyyə və iqtisadiyyatın digər sahələrinə yönəldilib".

Baş iqtisadçının sözlərinə görə, enerji sahəsində AİB "Şahdəniz" kimi nəhəng yatağın işlənməsini dəstəkləyib. Bundan başqa, Nail Vəliyev bildirib ki, Bakı-Ələt-Astara və Qazax - Gürcüstan sərhədi avtomobil yollarının tikintisi də AİB-in dəstəyi nəticəsində həyata keçirilib: "Onu da qeyd edim ki, AİB-dən cəlb olunan vəsaitlər hesabına Azərbaycanın bir neçə rayonunda su və kanalizasiya layihələri həyata keçirilir, bəziləri isə artıq yekunlaşıb".

Qonaq onu da bildirib ki, AİB ilə Azərbaycan maliyyə sahəsində də ciddi əməkdaşlıq edir: "Asiya İnkişaf Bankının bəzi yerli banklarla əməkdaşlığı olsa da, ilk dəfə olaraq bu il AİB Azərbaycanın bank sektoruna səhmdar qismində daxil olub və hazırda AccessBank-ın əsas səhmdarlarından biridir. İnanırıq ki, Azərbaycanda reallaşdırdığımız bütün layihələr kimi, bu yatırım da uğurlu olacaq".

Nail Vəliyev əlavə edib ki, AİB kapital bazarının inkişafı üçün də Azərbaycan hökuməti ilə sıx əməkdşalıq edir.

Təqdimatın sonunda mütəxəssis tələbələrlə öz təcrübəsini bölüşüb və onlara bəzi tövsiyələr verib.

Qeyd edək ki, 10 həftə davam edəcək "Access Business Talks" layihəsi çərçivəsində AccessBank-ın əməkdaşları, IELTS və müxtəlif iqtisadi sahələrin mütəxəssisləri tələbələrlə öz təcrübələrini bölüşür. Böyük hissəsi ingilis dilində aparılan bu çıxışların əsas məqsədi tələbələrin dil biliklərini artırmaqla yanaşı, dünyagörüşünün formalaşdırılması, biznes, maliyyə kimi sahələrdə yeni məlumatların əldə edilməsidir. 

Tələbələr üçün layihə davam etdiyi müddətdə maraqlı görüşlərlə yanaşı, bankda təşkil olunacaq ekskursiyada hər bir struktur bölmənin iş prosesi ilə yaxından tanış olmaq imkanı yaranacaq. Bundan başqa, layihə bitdikdən sonra tələbələr "AccessBank"da təcrübə proqramı keçib və müvafiq sertifikatla təltif olunacaq.