“Peşə təhsil sistemi Ermənistanın işğalçı dövründə ən çox zərər görən sistemlərdən biri olub”.

Bunu “Media və təhsil dialoqu” mövzusunda keçirilən təlimdə Peşə Təhsili üzrə Dövlət Agentliyinin direktor müavini Ceyhun Kərəmov bildirib. 

Onun sözlərinə görə, Azərbaycan torpaqları düşmən tərəfindən işğal edildikdən sonra peşə təhsili müəssisələrinə aid infrastrukturun təxminən 50 faizi qaçqın və məcburi köçkünlərin yerləşdirilməsi üçün istifadə olunurdu:

“Eyni zamanda, Azərbaycanın işğal altında olan torpaqlarında 12 peşə təhsil müəssisəsi fəaliyyət göstərirdi. İşğaldan sonra həmin təhsil müəssisələrinin altısı tamamilə fəaliyyətini dayandırıb, altısı isə köçkün məktəbləri formasında rayonlarda fəaliyyət göstərir. Torpaqlarımızın işğaldan azad olunması ilə İşçi qrup və komissiyalar dövlət qurumlarında bir çox işlər görür”.

“İşğaldan azad olunan torpaqlarda peşə təhsili müəssisələrinin fəaliyyəti ilə bağlı isə torpaqların yenidən qurulması siyasətinə uyğun olaraq profillər və ixtisaslar, infrastruktur, ilk məktəbin harada tikiləcəyi məsələlərinə baxılır”, - deyə o qeyd edib.

Oxu.Az